Azərbaycan istehsalı plagiat film və seriallar (SİYAHI)

Azərbaycanda ən zəif inkişaf edən sahələr sırasında film, serial xüsusi yer tutur.

Uzun illərdir ki, ölkədə keyfiyyətli film, serial nümunələri görmək mümkün deyil. Təbii ki, bu fikri bütün nümayiş olunan televiziya məhsullarına şamil etmək düzgün olmaz. Bəzən aralarında çox keyfiyyətli örnəklərə rast gəlmək mümkün olur. Lakin əfsuslar olsun ki, bu cür örnəklər bayağı, plagiat nümunələr arasında itib-batır.

Plagiatdan boş yerə bəhs etmədik. Bu dəfəki yazımızda sırf bu məsələdən bəhs edəcəyik. Minval.info Azərbaycanda nümayiş olunan müasir oğurluq film, reklam, serial nümunələrini təqdim edir.

Baş rollarında Fərda Xudaverdiyev, Elməddin Cəfərovun çəkildiyi, rejissor Samir Kərimoğlunun ekranlaşdırmış olduğu “Xoxan” filmi bir zamanlar çox müzakirələrə səbəb oldu. Filmi bəyənənlər də oldu, bəyənməyənlər də. Lakin film Türkiyə istehsalı olan “Kutsal Damacana” filmindən oğurluq idi.

Digər növbəti plagiat bir film isə baş rollarında rəqqasə Oksana Rəsulova və reper Elşad Xosenin çəkilmiş olduğu “Mələyin öpüşü”dür. “Mələyin öpüşü” də müasir izləyicilər arasında çox səs-küy yaratmışdı. Lakin filmin ssenarisi amerikan-ingilis romantik-komediya janrında çəkilmiş “Me before you” filmindən oğurlanmışdı.

2017-ci ildə Cabir İmanov tərəfindən ekranlaşdırılmış Planet Parni İz Baku film istehasılı “Ağanatiq” filmi bəyənilməyən, plagiat hesab edilən filmlər arasındadır. Belə ki, filmin ssenarisi şablon amerikan aksion filmləri ilə eynilik təşkil edir.

Həmçinin bir zamanlar Xəzər Tv-də yayımlanmış “Aramızda qalsın” serialı da türklərin məşhur “Çocuklar duymasın” serialından kopyalanmışdı. Hətta yerli serialdakı dialoqlarun orijinalı ilə eynilik təşkil etməsi də, izləyicilər arasında serial heç bir populyarlıq qazandıra bilmədi.

Müasir aktyorlarımız arasında Fərda Xudaverdiyev həmişə özünəməxsusluğu ilə seçilib. Belə demək olarsa, o, nə etsə, hər zaman qınaq obyektinə tuş gəlir. Elə onun “Selfinaz” adlı “Stand Up” şousu da türkiyəli aktyor Cem Yılmazın standup-larına bənzərliyi ilə çox diqqət çəkmişdi. Bu bənzərliyə görə aktyoru tənqid edənlər də çox oldu.

Plagiat filmlər arasına bir zamanlar sabiq ANS Şirkətlər Qrupu MMC-nin prezidenti Vahid Mustafayevin ekranlaşdırdığı “Xoca” filmini də daxil etmək olar. Film rusiyalı rejissor Aleksandr Kotun 2010-cu ildə çəkmiş olduğu “Brest qalası” filmi ilə eynidir. Hətta “Xoca” filmindəki müğənni Mina Sovetskayanın oxuduğu mahnı da rusiyalı bard Boris Qrebenşikovun musiqisi ilə eyniyyət dərəcəsindədir.